बर्थ डे स्पेशल: सोपा नव्हता नागराज मंजुळे यांचा इथवरचा प्रवास

 बर्थ डे स्पेशल: सोपा नव्हता नागराज मंजुळे यांचा इथवरचा प्रवास

बर्थ डे स्पेशल: सोपा नव्हता नागराज मंजुळे यांचा इथवरचा प्रवास

'सैराट' चित्रपटानं दिग्दर्शक नागराज मजुंळे यांना देशभरात ओळख करुन दिली. देशभरातील न्‍यूज चॅनलला नागराज यांनी मुलाखती दिल्‍या होत्या. महाराष्‍ट्रातील एका साध्‍या खेड्यातून आलेल्या नागराज यांनी आतंरराष्ट्रीय चित्रपट मोहोत्सवांमध्ये मराठी चित्रपटाला स्थान मिळवून दिलं. नागराज मंजुळे या नावाची जादू मराठी सिनेसृष्टीवर सध्या पाहायला मिळतेय. पण त्यांचा हा प्रवास खडतर होता.

पुस्तकांनी बदललं आयुष्य

नागराज मंजुळे यांचा जन्‍म सोलापूर जिल्‍ह्यातील करमाळा तालूक्‍यातील जेऊर गावी झालाय. नागराज यांच्या आई-वडिलांची परिस्थिती बेताची होती. त्यामुळं त्यांच्या वडिलांनी त्यांच्या मोठ्या भावाला नागराजला दत्तक म्हणून दिलं होतं. काकू आणि काकांनी त्यांचा सांभाळ केला. लहानपणापासू नागराज यांनी चित्रपट पाहण्याची आवड होती. पण तरुणपणात त्यांना नशेचं व्यसन लागलं. हे व्यसन दूर करण्यासाठी त्यांनी मदत घेतली ती पुस्तकांची. त्यांनी वेगवेगळ्या विषयांवरील पुस्तके वाचण्यास सुरुवात केली. आणि तिथून त्यांचं आयुष्य खऱ्या अर्थानं बदललं. असं ते सांगतात.

सुरक्षा रक्षकाची केली नोकरी

नागराज यांचा इथवरचा हा प्रवास काही सहज सोप्पा नव्हता. महाराष्‍ट्र पोलिस सेवेमध्‍येही नागराज यांची निवड झाली होती. मात्र काही महिन्‍यातच प्रशिक्षण सोडून नागराज घरी परत आले होते.इतकंच नाही तर नागराज यांना जेव्‍हा पैशाची अडचण आली तेव्हा त्यांनी सुरक्षा रक्षकाची नोकरी केली होती.

कवितांच्या रूपानं

सिनेसृष्टीत येण्यापूर्वी अक्षर ओळखही नसलेल्या घरातील मुलाला, मराठी साहित्यात मानाचा समजला जाणारा भैरूरतन दमाणी पुरस्कार मिळाला होता. भावना आणि अनुभवांना कवितांच्या रूपानं व्यक्त करणाऱ्या या कवीच्या, नागराज मंजुळे यांच्या पहिल्याच कवितासंग्रहाला समीक्षकांची वाहवा मिळाली होती. मात्र, कवी ही त्यांची एकमेव ओळख राहिली नाही.. 'पिस्तुल्या' या त्यांनी दिग्दशिर्त केलेल्या 'शॉर्ट फिल्म'ला तीन राष्ट्रीय पुरस्कारांनी गौरविण्यात आलं होतं.

फॅन्ड्री, सैराट आणि नाळ

मराठी सिनेसृष्टीत नागराज मंजुळे यांच्या सिनेमाचा एक वेगळाच चाहता वर्ग आहे. त्यांच्या फॅन्ड्री सिनेमापासून ते नाळ चित्रटापर्यंत प्रेक्षकांनी त्यांच्या प्रत्येक कलाकृतीचं प्रेक्षकांनी भरभरून कौतुकही केलं आहे. 'सैराट'नं तर इतिहासच रचला आहे. हिंदी सेनेसृष्टीलाही आता नागराज यांच्या चित्रपटांची भुरळ पडली आहे.

'झुंड'ची उत्सुकता

नागराज मंजुळे यांनी दिग्दर्शित केलेला 'झुंड' सिनेमा केव्हा प्रेक्षकांच्या भेटीला येणार हे अद्यापही गुलदस्त्यात ठेवण्यात आलं असलं तरी हा चित्रपट नागराज यांच्यासाठी खास आहे. या चित्रपटात महानायक अमिताभ बच्चन यांनी महत्त्वाची भूमिका साकारली आहे. त्यामुळं प्रेक्षकही उत्सुक आहेत.